Phili 1 | HauSRK | STEP | Wasiƙa daga Bulus da Timoti, bayin Kiristi Yesu, zuwa ga dukan tsarkaka cikin Kiristi Yesu a Filibbi, tare da masu kula da Ikkilisiya da kuma masu hidima:

Philippians 1

1 Wasiƙa daga Bulus da Timoti, bayin Kiristi Yesu,

zuwa ga dukan tsarkaka cikin Kiristi Yesu a Filibbi, tare da masu kula da Ikkilisiya ^{▼▼A alʼadance su bishob} da kuma masu hidima:

2 Alheri da salama gare ku daga Allah Ubanmu da kuma Ubangiji Yesu Kiristi.

Godiya da Adduʼa

3 Ina gode wa Allahna a kowane lokacin da na tuna da ku. 4 A cikin dukan adduʼoʼina dominku duka, nakan yi adduʼa da farin ciki kullum 5 saboda tarayyarku a cikin bishara daga ranar farko har yǎ zuwa yanzu, 6 da tabbacin cewa wanda ya fara kyakkyawan aikin nan a cikinku, zai kai shi ga kammalawa har yǎ zuwa ranar Kiristi Yesu.

7 Daidai ne in yi wannan tunani game da dukanku, da yake kuna a zuciyata; domin ko ina ɗaure cikin sarƙoƙi ko ina kāre bishara ina kuma tabbatar da ita, dukanku kuna tarayya cikin alherin Allah tare da ni. 8 Allah shi ne shaidata, ya san yadda nake ƙaunarku duka da ƙaunar Kiristi Yesu.

9 Adduʼata ita ce: ƙaunarku ta yi ta cin gaba da ƙaruwa cikin sani da kuma zurfin ganewa, 10 don ku iya rarrabe abin da yake mafi kyau, ku kuma zama da tsarki, marasa aibi har yǎ zuwa ranar Kiristi, 11 cikakku da sakamakon aikin adalci da yake zuwa ta wurin Yesu Kiristi-zuwa ga ɗaukakar Allah da kuma yabonsa.

Sarƙoƙin Bulus Sun Sa Ci gaban Bishara

12 To, ina so ku sani ʼyanʼuwa, cewa abin da ya faru da ni ya sa cin gaban bishara. 13 Ta haka, ya zama sananne ga dukan masu gadin fada ^{▼▼Ko kuwa dukan fada} da kuma ga kowa cewa an ɗaure ni da sarƙoƙi saboda Kiristi. 14 Saboda sarƙoƙina, yawancin ʼyanʼuwa cikin Ubangiji sun sami ƙarfafawa su yi maganar Allah gabagaɗi da kuma babu tsoro.

15 Gaskiya ce cewa waɗansu suna yin waʼazin Kiristi saboda kishi da neman faɗa, amma waɗansu da nufi mai kyau suke yi. 16 Na biye suna yin haka cikin ƙauna, da sanin cewa an sa ni a nan ne domin kāriyar bishara. 17 Na farin dai suna waʼazin Kiristi da sonkai ne, ba da zuciya ɗaya ba, a sonsu, su wahalar da ni a cikin sarƙoƙi. ^{▼▼Waɗansu rubuce rubucen hannun da ba su daɗe ba suna da aya 17 kafin aya 16.} 18 Me kuma? Ta ko yaya dai, ko da gangan, ko da gaske, ana shelar Kiristi. Domin wannan kuwa ina farin ciki.

I, zan kuwa ci gaba da farin ciki, 19 gama na san cewa ta wurin adduʼoʼinku da kuma taimako daga Ruhun Yesu Kiristi, abin da ya same ni zai zama sanadin kuɓutata. 20 Ina saurara da marmari da kuma bege cewa ba zan taɓa shan kunya ba, sai dai zan sami issashen ƙarfin hali yanzu kamar kullum, za a ɗaukaka Kiristi a jikina, ko ta wurin rayuwa ko kuma ta wurin mutuwa. 21 Gama a gare ni, rai Kiristi ne, mutuwa kuma riba ce. 22 In zan ci gaba da rayuwa a cikin jiki, wannan zai zama aiki mai amfani a gare ni. Duk da haka me zan zaɓa? Ban sani ba! 23 Na rasa wanda zan zaɓa cikin biyun nan: Ina shaʼawa in yi ƙaura in zauna tare da Kiristi, wannan kuwa ya fi kyau nesa ba kusa ba; 24 amma ya fi muku in rayu cikin jiki. 25 Na tabbata haka ne, na kuwa san zan wanzu in zauna tare da ku duka, domin ku ci gaba, bangaskiyarku tana sa ku farin ciki, 26 domin ta wurin kasancewata tare da ku, farin cikinku cikin Kiristi Yesu zai cika sosai ta dalilina. 27 Komene ne ya faru, ku yi zaman da ya cancanci bisharar Kiristi. Ta haka, ko na zo na gan ku, ko ban zo ba, in ji labari cewa kun tsaya da ƙarfi a cikin ruhu ɗaya, kuna fama kamar mutum ɗaya saboda bangaskiyar bishara 28 ba tare da kun ji tsoron waɗanda suke gāba da ku ta kowace hanya ba. Wannan alama ce a gare su cewa za a hallaka su, amma a gare ku za a cece ku-wannan tabbacin kuwa daga wurin Allah ne. 29 Gama an ba ku zarafi a madadin Kiristi cewa ba gaskatawa da shi kaɗai ba kuka yi ba, har ma ku sha wahala dominsa, 30 da yake kuna shan faman da kuka gan na sha, kuna kuma jin cewa har yanzu ina sha.